مجلة العاشر الأدبية - ماهو أنا يللي - بقلمي الشاعر الزجال ابو سائد السيلاوي

 

ماهو أنا يلّلي بنافِق بالكلام

أمّا بقول الصَح أو بَصْمُت أكيد
ماهو أنا يللي بعاتب في الخصام

أمّا بكون صبور أو بَبْعِد بعيد
ماهو أنا يللي بجاهِر في الملام

أما بكون الّلين أو بَرضى العنيد
ماهو أنا يللي بيرضى بالحُطام

أما شِعِر موزون أو حذف القصيد
ماهو أنا يللي بخاف من الظلام

أما بكون النور أو نار الوقيد
ماهو أنا يللي بجامل بالسلام

أما بكون وَفِيّْ أو أهجر وحيد
ماهو أنا يللي حَنى للغدِر هام

أما بكون الحُر أو عزمي حديد
ماهو أنا يللي بيرمي للحسام

أما بكون سَموح أو قاسي عنيد
ماهو أنا يللي على ذُلٍّ ينام

أما كرامة وعِز أو مَيّت شهيد
بقلمي

الشاعر الزجال

 ابو سائد السيلاوي