سلام للشله
★★★★★★
يا صاحبي ياريت تسلم لي على الشِله
تبلغهُم بإن الشِده بتعرف
مين اللي صُحبتُه تشرف
ومين ليه مين ولُه وشين
وبان في الشِده من غِله
جدع قِله
يا صاحبي ياريت تسلم لي على الشِله
وبلغهُم بإني ف تعبي قد قررت
بدون عصبيتي الطارحه على جبيني
بدون حنية الدمعات على رمشي وبين عيني
ومن غير قيد ومن دون شرط
هقاطِع أي حد بخيل
وكُل اعوج وكُل رزيل
وكل كبير لكن عقلُه كما الزغاليل
وكل سقيل عمل ف غيابي واد فِله
يا صاحبي ياريت تسلم لي على الشِله
وعرفهُم بإني خلاص نسيت مجلسهُم المحبوب
وضحكات صفرا بتخبي مرار ف قلوب
كلام بالضحك بيشيل ميزاننا ذنوب
وقعده ليلاتي تتكرر لنهش جيوب
وعرفهُم بإن رأيُهم فيا صحيح جداً
أنا الغلطان وليا لسان يفوق المسطره عداً
وطول عُمره يقول الكِلمه بتعور كضرب الطوب
وبُص كمان أنا الغلطان
عشان أعلنت عصياني علي الدُخان وع الشيشه
حاولت أبقي على الصحه
هِنا ف صدري ك تحويشه
مع صُحبه بتحرق صدرها وصدري !؟
كما أخشاب ف عود الغاب كما الهيشه
بتدويشه تلف الخنقه ف سيجاره بكارتله
يا صاحبي ياريت تسلم لي على الشِله
أخيرا ولجل ايام هدى و نفحات
وخير نازِل مع الأنوار مِن السموات
وطمع الكُل في الغُفران وف الحسنات
أنا هنسى اللي فات كُله خلاص قد مات
وهكسر خلفهُم غصبا زيار ندمي
مع صبري و200 قُله
خلاص عفواً بلاش أبداً
تسلم لي على الشِله
ليست هناك تعليقات:
إرسال تعليق