مصطبة العامية المصرية - من ديوان ولسه الفؤاد عطشان للشاعر/ مصطفى فريد

جزء من رباعيات
معاك كتابك
من ديوان

ولسه الفؤاد عطشان
للشاعر/ مصطفى فريد

غواك شيطانك ليه
نساك بتعمل ايه
والدنيا بنت الإيه
لبست لك الالوان

فى ثانيه يجى الموت
متخفى ماله صوت
ويغرق الملكوت
ما يدوم سوى المنان

يعود بصرنا حديد
والجسم كله جليد
فين أنت يا صنديد
م العز والسلطان

كل إللى جابك رجع
سابك فى حضن الوجع
وانت اللى كنت الجدع
ما فارقت يوم خلان

فاتوك وحيد وحزين
فى قبر مبنى بطين
تسأل بخوف أنا فين
تلقى السؤال حيران

كنت الوحيد مسؤول
عن كل فعل وقول
عن آخرتك مشغول
فى دنية التوهان

لا مال كنزته نفع
ولا بيت حرام ارتفع
ولا حد جالك شفع
فى إللى عملته زمان

آخرتها نوح ودموع
وأنين سنين موجوع
ونهاية الموضوع
تخرج بلا استئذان

وبعد لحظة تفوق
تنظر ثوانى لفوق
ييجى العمل ملفوق
قدام عنيك ببيان

كل اللى فات مطبوع
كشف مافهش رجوع
عشت الحياه مخدوع
إيه خدته غير حرمان

جزء من رباعيات معاك كتابك
من ديوان

ولسه الفؤاد عطشان
للشاعر/ مصطفى فريد