مجلة مصطبة العامية المصرية -من غيرك هاعيش من ديوان/ على الربابة للشاعر / مصطفى فريد

من غيرك هاعيش
من ديوان/ على الربابة
للشاعر / مصطفى فريد

تسمعى ما تسمعيش
ترجعى ماترجعيش
إللى عايزك تعرفيه
بيكى من غيرك هاعيش

الغيرة منك ليه بقت
شك وظنون ما بتنتهيش
والدنيا عندك اصبحت
كلمة عتاب مابتتنسيش
يوم معاكى الدنيا جنه
وشهر نار مابتنطفيش
ويوم بحبك ويوم كرهتك
انتى ايه ما بتتعبيش

كنت ياما كتير اسامح
وانسى ألمى عشان أعيش
وإن زعلتى كنت اصالح
واقول ياروحى ماتزعليش
النهاردة إن غبتى عنى
الغياب مايهمنيش
مهما كان مقدار حنينى
وحبى ليكى ماتخافيش
قادر انسى الحزن فيكى
ولازم انسى عشان اعيش
مش هادور يوم عليكى
إبعدى ولا ترجعيش
بس عندى كلمه ليكى
إن كرهتى ما تظلميش

من غيرك هاعيش
من ديوان/ على الربابة 
للشاعر / مصطفى فريد