مجلة العاشر الأدبية - كتبت الشعر ف جمالها - بقلمي #فهمى_على

كتبت الشعر ف جمالها 

و مش عحبانى احوالها
باحايل فيها بحروفى
تزود هى فى دلالها

باغنيلها ... ماهيش سامعة
و جوا عيونى ١٠٠ دمعة
ما انا روحى بتهواها
و احلامى لها شمعة

باشوفها لسه بنوتة
بروح صافية .. كبسكوتة
تغنيلها بشوق قلبى
و اشوف ف عنيها حدوتة

و اخاصم روحى جواها
و اسيب القلب يهواها
و اطفى الشوق بضحكتها
و عمرى ف يوم ما بانساها

اشوف الدنيا بعنيها
و تبقى غنوة اغنيها
بتعزف لحنها نفسى
و انا نفسى اعيش بيها

عشقت وعمرى يوم ما هاتوب
و هادى و راضى بالمكتوب
ما هى الدنيا ف احضنها
بتلبس بالفرح ١٠٠ توب

جميل ليلها و نجومه اصحاب
بتفتح للهنا ١٠٠ باب
و انا فيها بالاقينى
باحب بجد ... مش كداب

باحنلها ... ما بانكرشى
و تظلمنى ما افكرشى
و رغم الهم و التوهة
على بعادها .. ما باقدرشى

بعيد عنها .. باناديلها
و اقيد ف السر قناديلها
و مهما لسانى سب ف يوم
باعود تانى و اغنيلها

هاقول فيها كتير .. و هاعيد
ف ضحكتها باحس العيد
و باتواعد مع نورها
و دايما تخلف المواعيد

يا اهل الله يا ناس فاهمين
يا عارفين قلبى يقصد مين
امانة عليكو تقولو لها
يا مصر العشق ... روحتى لفين 

بقلمي
#فهمى_على