قصيدتي الجديدة
في الزحام
بعد توثيقها صوت وصورة
في مؤسسة اسرار الاسبوع
الشاعر رضا ابو شنب
ميت غمر دقهلية
١٠/٨/٢٠١٨
وانا كنت ماشي في الزحام
تعبان بعاني من الالام
راسي بتشكي من الصداع
والبرد وياه الزكام
الاقي حد يزقني
والتاني يضرب من الامام
واللي علي رجلي يدوس
ويبتسم لي في الختام
واللي يرفع ايده ليا
كانه يضرب لي سلام
سامع كلام جواه كلام
واحد تمللي بيشتكي
وعجوز وغرقان في الغرام
واحده بتحكي عن الخضار
والتانيه بتنضف حمام
وغفير بيسال المدير
هو الدولار اليوم بكام
وطابور طويلللللل
مليان صراخ
وشاويش ينال الاحترام
وصوت شديد بيهزنا
صوت الضمير
فقيرو ضايع وسطنا
وصراخه يعلي للسما
يامن بايدكم امرنا
الضرب في الميت حرام
يامن بايدكم امرنا
الضرب في الميت حرام
............
وانا في الزحام
وبعاني لسه من الام
لقيت عنيا قفلت
وروحي سرحت في الخيال
والشمس بعدت عننا
والكون بيسبح في الظلام
لاقيت ضعيف علي الرصيف
جنب اللي بيته من رخام
لقيت كفيف ماسك رغيف
وبيحسدوه علي الطعام
ولقيت غني ماله حرام
بيطيره زي الحمام
لقيت غفير راكب حمار
وهو فوقه بيترسم
بيضربه تحت الحزام
و جماعه كانو بيضحكو
بيحكو عن راجل جبان
بيعلي صوته وسطنا
وتمللي خايف من المدام
وعبيط وسارح بالغنم
مرشد يغير الذمم
ويلقبوه صاحب المقام
بيغيرو في دين النبي
اللي بنوره بهتدي
ويعيشو دايما في الظلام
لو جينا نمشي للامام
بيرجعونا الف عام
...........
سامع كلام جواه كلام
صداه يزلزل المكان
بنكتمه جوا النفوس
ونعاني من كتر الالام
سمعته مرة من فؤاده
وشوفته مكتوب
علي الحيطان
كلام بيخرم الودان
اخاف يحاسبوني عليه
لو قلته مرة في المنام
مكتوب عليكي يا بلدنا
يسرقو منك اثارك
يفسدو فيكي الطعام
يقتلو زينة شبابك
حتي في عز الصيام
يقتلو فيكي الصناعه
ويرفعو فيكي الدولار
هما يا امه بيسرقوكي
واحنا بنشد الحزام
هما يا امه بيسرقوكي
واحنا بنشد الحزام
ليست هناك تعليقات:
إرسال تعليق